nai zamin naya aasman banate hain

na.ī zamīn nayā āsmāñ banāte haiñ

ham apne vāste apnā jahāñ banāte haiñ

bujhī bujhī sī vo tasvīr-e-jāñ banāte haiñ

kahīñ charāġh kahīñ par dhuāñ banāte haiñ

bayān karte haiñ ham dāstān lafzoñ meñ

zarā sī baat kī vo dāstāñ banāte haiñ

chamaktī dhuup meñ kirneñ sameTte haiñ ham

unhīñ ko taan ke phir sā.ebāñ banāte haiñ

sukūn-e-dil ke liye ham bhī roz kāġhaz ke

kabhī to phuul kabhī titliyāñ banāte haiñ

jo madd-o-jazr se vāqif nahīñ haiñ dariyā ke

vo sāhiloñ pe hī aksar makāñ banāte haiñ

banāte rahte haiñ 'jāved' kashtiyāñ lekin

ham un ke vāste phir bādbāñ banāte haiñ

nai zamin naya aasman banate hain

hum apne waste apna jahan banate hain

bujhi bujhi si wo taswir-e-jaan banate hain

kahin charagh kahin par dhuan banate hain

bayan karte hain hum dastan lafzon mein

zara si baat ki wo dastan banate hain

chamakti dhup mein kirnen sameTte hain hum

unhin ko tan ke phir saeban banate hain

sukun-e-dil ke liye hum bhi roz kaghaz ke

kabhi to phul kabhi titliyan banate hain

jo madd-o-jazr se waqif nahin hain dariya ke

wo sahilon pe hi aksar makan banate hain

banate rahte hain 'jawed' kashtiyan lekin

hum un ke waste phir baadban banate hain