nak-chaDhi baam par chaDhi hogi

nak-chaḌhī baam par chaḌhī hogī

chāñd kī 'iid ho ga.ī hogī

ye diyā be-sabab nahīñ raushan

ab vahāñ shaam ho chukī hogī

raakh dil kī kuredtī hogī

vo bhī barbād to huī hogī

nāma-bar ḳhat nayā ye de aanā

vo purānā hī chūmtī hogī

aaj kyoñ dil hai be-qarār bahut

bahs-o-takrār ho ga.ī hogī

dil kahāñ be-sabab dhaḌaktā hai

baat koī to an-kahī hogī

shor barpā hai ḳhāna-e-dil meñ

phir se dīvār gir ga.ī hogī

us kī āñkhoñ meñ paḌ ga.e halqe

raat bhar vo bhī jāgtī hogī

'jogī' vahm-o-ḳhayāl hai terā

vo tire ḳhvāb dekhtī hogī

ḳhush-gumānī hai raqs-e-mai-kash kī

mai kī botal bhī nāchtī hogī

hastī uktā ga.ī hai bastī se

ab kahīñ duur jhoñpḌī hogī

vaqt rahtā nahīñ kahīñ Tik kar

dil kī ḳhaslat bhī vaqt sī hogī

ruuh aur jism ke tafāvut meñ

ḳhaak tashrīf-āvrī hogī

baat gahrī na kījiye sāhab

nāzukī baat sun rahī hogī

nak-chaDhi baam par chaDhi hogi

chand ki 'id ho gai hogi

ye diya be-sabab nahin raushan

ab wahan sham ho chuki hogi

rakh dil ki kuredti hogi

wo bhi barbaad to hui hogi

nama-bar KHat naya ye de aana

wo purana hi chumti hogi

aaj kyon dil hai be-qarar bahut

bahs-o-takrar ho gai hogi

dil kahan be-sabab dhaDakta hai

baat koi to an-kahi hogi

shor barpa hai KHana-e-dil mein

phir se diwar gir gai hogi

us ki aankhon mein paD gae halqe

raat bhar wo bhi jagti hogi

'jogi' wahm-o-KHayal hai tera

wo tere KHwab dekhti hogi

KHush-gumani hai raqs-e-mai-kash ki

mai ki botal bhi nachti hogi

hasti ukta gai hai basti se

ab kahin dur jhonpDi hogi

waqt rahta nahin kahin Tik kar

dil ki KHaslat bhi waqt si hogi

ruh aur jism ke tafawut mein

KHak tashrif-awri hogi

baat gahri na kijiye sahab

nazuki baat sun rahi hogi