naKHl-e-hasti pe jo ashkon ka samar lagta hai

naḳhl-e-hastī pe jo ashkoñ kā samar lagtā hai

mausam-e-hijr kī talḳhī kā asar lagtā hai

dil ko taskīn milī jab se milā huuñ us se

yaar vo shaḳhs mujhe ahl-e-nazar lagtā hai

'umr khā jaatī hai manzil kī masāfat hamdam

zindagī mujh ko kaThin terā safar lagtā hai

ek sunsān mohalla hai mirā siina aur

is mahalle meñ ye dil qais kā ghar lagtā hai

jhuk ke chaltā huuñ to kamzor na samjho mujh ko

shāḳh jhuktī hai vahī jis pe samar lagtā hai

ḳhud meñ jhāñkā to khulā mujh pe ki duniyā meñ kyoñ

ek insān ko insān se Dar lagtā hai

husn nazroñ meñ nahīñ terī vagarna dekhe

merā mahbūb mujhe rashk-e-qamar lagtā hai

mere she'roñ pe sabhī vaah kiye jaate haiñ

kaun samjhegā mirā ḳhūn-e-jigar lagtā hai

jang jītoge 'adīl' us se vafā kī kaise

jis kā har 'aib zamāne ko hunar lagtā hai

naKHl-e-hasti pe jo ashkon ka samar lagta hai

mausam-e-hijr ki talKHi ka asar lagta hai

dil ko taskin mili jab se mila hun us se

yar wo shaKHs mujhe ahl-e-nazar lagta hai

'umr kha jati hai manzil ki masafat hamdam

zindagi mujh ko kaThin tera safar lagta hai

ek sunsan mohalla hai mera sina aur

is mahalle mein ye dil qais ka ghar lagta hai

jhuk ke chalta hun to kamzor na samjho mujh ko

shaKH jhukti hai wahi jis pe samar lagta hai

KHud mein jhanka to khula mujh pe ki duniya mein kyon

ek insan ko insan se Dar lagta hai

husn nazron mein nahin teri wagarna dekhe

mera mahbub mujhe rashk-e-qamar lagta hai

mere she'ron pe sabhi wah kiye jate hain

kaun samjhega mera KHun-e-jigar lagta hai

jang jitoge 'adil' us se wafa ki kaise

jis ka har 'aib zamane ko hunar lagta hai