naKHl-e-ummid mein samar aaya

naḳhl-e-ummīd meñ samar aaya

husn un kā murād par aaya

qasd-e-ka.aba thā dair meñ pahūñchā

kis taraf dhyān thā kidhar aaya

royā maiñ yād-e-yār meñ jab jab

sail ashkoñ kā tā kamar aaya

vāsta go diyā payambar kā

na mirā phir ke nāma-bar aaya

kar diyā kushta charḳh ne lekin

na baġhal meñ vo sīm-bar aaya

ḳhuub dekhā magar sivā tere

na koī dūsrā nazar aaya

jaan dī ham ne dard-e-furqat se

na ḳhabar ko vo be-ḳhabar aaya

sub.h kī ham ne taare gin gin kar

par vo mah-rū na raat bhar aaya

kaT ga.ī bātoñ hī meñ vasl kī raat

mudda.ā dil kā kuchh na bar aaya

jab diyā us ne bhar ke ġhair ko jaam

ḳhuun āñkhoñ meñ merī bhar aaya

ho ga.ī sharm māne'-e-vaslat

rahm bhī un ko mujh pe gar aaya

nazar-e-charḳh se girā ḳhurshīd

mahvash apnā jo baam par aaya

apne dil meñ ye soch lo 'vahbī'

jaan jā.egī dil agar aaya

naKHl-e-ummid mein samar aaya

husn un ka murad par aaya

qasd-e-kaba tha dair mein pahuncha

kis taraf dhyan tha kidhar aaya

roya main yaad-e-yar mein jab jab

sail ashkon ka ta kamar aaya

wasta go diya payambar ka

na mera phir ke nama-bar aaya

kar diya kushta charKH ne lekin

na baghal mein wo sim-bar aaya

KHub dekha magar siwa tere

na koi dusra nazar aaya

jaan di hum ne dard-e-furqat se

na KHabar ko wo be-KHabar aaya

subh ki hum ne tare gin gin kar

par wo mah-ru na raat bhar aaya

kaT gai baaton hi mein wasl ki raat

muddaa dil ka kuchh na bar aaya

jab diya us ne bhar ke ghair ko jam

KHun aankhon mein meri bhar aaya

ho gai sharm mane'-e-waslat

rahm bhi un ko mujh pe gar aaya

nazar-e-charKH se gira KHurshid

mahwash apna jo baam par aaya

apne dil mein ye soch lo 'wahbi'

jaan jaegi dil agar aaya