nam is liye aankhon mein numu-yab nahin hai

nam is liye āñkhoñ meñ numū-yāb nahīñ hai

mujh ret ke dariyā meñ kahīñ aab nahīñ hai

nīñdoñ kī talabgār to hai aañkh hamārī

bas mas.ala ye hai ki koī ḳhvāb nahīñ hai

bāzār meñ bhī haath pakaḌ letā hai merā

ye ishq abhī vāqif-e-ādāb nahīñ hai

tū vasl kā mausam hai sadā sabz rahegā

maiñ hijr kā vo khet jo sairāb nahīñ hai

ye log tire ishq se mahrūm haiñ mālik

aur is se baḌā dukh koī betāb nahīñ hai

kis ranj ne dāġhā hai tire husn pe bosa

āñkhoñ meñ vo pahlī sī tab-o-tāb nahīñ hai

mushkil hai ki ab koī pisar baap pe jaa.e

rustam to bahut haiñ koī sohrāb nahīñ hai

ye dukh bhī baḌā dukh hai ki is shahr meñ 'shīrān'

ahbāb to haiñ halqa-e-ahbāb nahīñ hai

nam is liye aankhon mein numu-yab nahin hai

mujh ret ke dariya mein kahin aab nahin hai

nindon ki talabgar to hai aankh hamari

bas masala ye hai ki koi KHwab nahin hai

bazar mein bhi hath pakaD leta hai mera

ye ishq abhi waqif-e-adab nahin hai

tu wasl ka mausam hai sada sabz rahega

main hijr ka wo khet jo sairab nahin hai

ye log tere ishq se mahrum hain malik

aur is se baDa dukh koi betab nahin hai

kis ranj ne dagha hai tere husn pe bosa

aankhon mein wo pahli si tab-o-tab nahin hai

mushkil hai ki ab koi pisar bap pe jae

rustam to bahut hain koi sohrab nahin hai

ye dukh bhi baDa dukh hai ki is shahr mein 'shiran'

ahbab to hain halqa-e-ahbab nahin hai