nang dhaDang malang tarang mein aaega jo wahi kaam karenge

nañg dhaḌañg malañg tarañg meñ aa.egā jo vahī kaam kareñge

kufr kareñge jo aayā jī jī chāhā to islām kareñge

rāste bhar us ruup kī dhuup meñ jaan khapā.eñge maut kī had tak

chalte samay phir us kī zulf kī chhāñv meñ bisrām kareñge

dekho tum apne kachche dar-o-dīvār ko pakkā mat karvānā

shahr meñ jab bhī ā.eñge ham to tumhāre ghar hī qayām kareñge

aaj hamāre saroñ par hai ye sūraj par kal ḳhaak meñ hogā

ham ne to bas āvāz lagā dī baaqī kaam avaam kareñge

ham ko ek bahut hī baḌī sachchā.ī ko afsāna karnā hai

ḳhuub piyeñge sharāb-e-vahm aur ḳhuub ḳhayāl-e-ḳhām kareñge

ishq hī puurī tarah kar leñ to samjho koī jihād kiyā hai

ye 'farhat-ehsās' azal ke kāhil kyā koī kaam kareñge

nang dhaDang malang tarang mein aaega jo wahi kaam karenge

kufr karenge jo aaya ji ji chaha to islam karenge

raste bhar us rup ki dhup mein jaan khapaenge maut ki had tak

chalte samay phir us ki zulf ki chhanw mein bisram karenge

dekho tum apne kachche dar-o-diwar ko pakka mat karwana

shahr mein jab bhi aaenge hum to tumhaare ghar hi qayam karenge

aaj hamare saron par hai ye suraj par kal KHak mein hoga

hum ne to bas aawaz laga di baqi kaam awam karenge

hum ko ek bahut hi baDi sachchai ko afsana karna hai

KHub piyenge sharab-e-wahm aur KHub KHayal-e-KHam karenge

ishq hi puri tarah kar len to samjho koi jihad kiya hai

ye 'farhat-ehsas' azal ke kahil kya koi kaam karenge