nange panw ki aahaT thi ya narm hawa ka jhonka tha

nañge paañv kī aahaT thī yā narm havā kā jhoñkā thā

pichhle pahar ke sannāTe meñ dil dīvāna chauñkā thā

pāñchoñ havās kī bazm sajā kar us kī yaad meñ baiThe the

ham se pūchho shab-e-judā.ī kab kab pattā khaḌkā thā

aur bhī the us kī mahfil meñ bāteñ sab se hotī thiiñ

sab kī aañkh bachā kar us ne ham ko tanhā dekhā thā

duniyā to duniyā hī Thahrī rañg badaltī rahtī hai

dukh to ye hai dhyān kisī kā ghaTtā baḌhtā saayā thā

kaisā shikva kaisī shikāyat dil meñ yahī socho 'jāved'

tum hī ga.e the us kī galī meñ vo kab tum tak aayā thā

nange panw ki aahaT thi ya narm hawa ka jhonka tha

pichhle pahar ke sannaTe mein dil diwana chaunka tha

panchon hawas ki bazm saja kar us ki yaad mein baiThe the

hum se puchho shab-e-judai kab kab patta khaDka tha

aur bhi the us ki mahfil mein baaten sab se hoti thin

sab ki aankh bacha kar us ne hum ko tanha dekha tha

duniya to duniya hi Thahri rang badalti rahti hai

dukh to ye hai dhyan kisi ka ghaTta baDhta saya tha

kaisa shikwa kaisi shikayat dil mein yahi socho 'jawed'

tum hi gae the us ki gali mein wo kab tum tak aaya tha