nanha sa diya hai ki tah-e-ab hai raushan

nanhā sā diyā hai ki tah-e-āb hai raushan

bujhtī huī āñkhoñ meñ koī ḳhvāb hai raushan

sunsān jazīre meñ chamaktā huā taarā

dil hai ki koī kashtī-e-shab-tāb hai raushan

dahshat ke farishte haiñ fasīloñ pe havā kī

aur chāroñ taraf shahr ke sailāb hai raushan

maiñ Dūbtā jaatā huuñ tirī mauj-e-badan meñ

yuuñ raqs meñ kirneñ haiñ ki gardāb hai raushan

haañ jism ke is qarya-e-be-nūr ke andar

ab bhī vo tire lams kā mahtāb hai raushan

maiñ DhūñDhtā phirtā huuñ jise bām-e-falak par

vo chāñd sar-e-halqa-e-ahbāb hai raushan

'shāhid' ki jo vo ḳhāk-nashīñ mahram-e-jāñ hai

sajdoñ se abhī us ke ye mehrāb hai raushan

nanha sa diya hai ki tah-e-ab hai raushan

bujhti hui aankhon mein koi KHwab hai raushan

sunsan jazire mein chamakta hua tara

dil hai ki koi kashti-e-shab-tab hai raushan

dahshat ke farishte hain fasilon pe hawa ki

aur chaaron taraf shahr ke sailab hai raushan

main Dubta jata hun teri mauj-e-badan mein

yun raqs mein kirnen hain ki gardab hai raushan

han jism ke is qarya-e-be-nur ke andar

ab bhi wo tere lams ka mahtab hai raushan

main DhunDhta phirta hun jise baam-e-falak par

wo chand sar-e-halqa-e-ahbab hai raushan

'shahid' ki jo wo KHak-nashin mahram-e-jaan hai

sajdon se abhi us ke ye mehrab hai raushan