nanhe hathon mein kaTora nahin dekha jata

nanhe hāthoñ meñ kaTorā nahīñ dekhā jaatā

ham se ġhurbat ye tamāshā nahīñ dekhā jaatā

hākim-e-vaqt batā kaise guzāreñ shab-o-roz

har taraf ḳhauf kā pahrā nahīñ dekhā jaatā

dostoñ haq ke liye ho ke anā kī ḳhātir

jang meñ apnā parāyā nahīñ dekhā jaatā

is liye 'ilm kī sham'oñ ko jalāte haiñ ham

shahr kā ham se añdherā nahīñ dekhā jaatā

kabhī ik Dūbne vaale kī sunī thiiñ chīḳheñ

ham se ab jānib-e-dariyā nahīñ dekhā jaatā

yak-ba-yak jaise badal jaatā hai mausam 'rizvāñ'

is tarah us kā badalnā nahīñ dekhā jaatā

nanhe hathon mein kaTora nahin dekha jata

hum se ghurbat ye tamasha nahin dekha jata

hakim-e-waqt bata kaise guzaren shab-o-roz

har taraf KHauf ka pahra nahin dekha jata

doston haq ke liye ho ke ana ki KHatir

jang mein apna paraya nahin dekha jata

is liye 'ilm ki sham'on ko jalate hain hum

shahr ka hum se andhera nahin dekha jata

kabhi ek Dubne wale ki suni thin chiKHen

hum se ab jaanib-e-dariya nahin dekha jata

yak-ba-yak jaise badal jata hai mausam 'rizwan'

is tarah us ka badalna nahin dekha jata