naqab-e-fitrat uTha raha hun wafa ka chehra dikha raha hun

naqāb-e-fitrat uThā rahā huuñ vafā kā chehra dikhā rahā huuñ

kabhī jo apnā na ho sakā thā usī ko apnā banā rahā huuñ

jo sust baiThī haiñ ārzūeñ maiñ un ke shāne hilā rahā huuñ

jo thak ke jazbāt so rahe haiñ unheñ maiñ phir se jagā rahā huuñ

havā.eñ ho jā.eñgī muḳhālif nahīñ mujhe is kī koī parvā

lahū kī būñdeñ girā girā kar maiñ apnā gulshan sajā rahā huuñ

maiñ dushmanī ke qarīb jā kar talāsh kartā huuñ dostī ko

jo mujh se nafrat barat rahe haiñ unheñ maiñ apnā banā rahā huuñ

sitam tumhārā jafā tumhārī jo yaad aane lage haiñ mujh ko

gumān kuchh aisā ho rahā hai tumheñ bhī maiñ yaad aa rahā huuñ

nahīñ hai hairat kī baat koī ye zarf merā hai merī jur.at

hai jis jagah bijliyoñ kī kasrat vahīñ nasheman banā rahā huuñ

maiñ jāntā huuñ vajūd phūloñ kā aur kāñToñ kā hai chaman meñ

maiñ phuul bhī chun rahā huuñ aur ḳhaar se bhī dāman bachā rahā huuñ

tumhāre kaam aa.egā hamesha ye tohfa-e-dil qubūl kar lo

tumhārā chehra dikhāne tum ko ik aa.ina saath lā rahā huuñ

jo merā andāz-e-guftugū hai vahī hai ijz-e-mohabbat 'akmal'

ġhazal ke parde meñ aaj afsāna apnā un ko sunā rahā huuñ

naqab-e-fitrat uTha raha hun wafa ka chehra dikha raha hun

kabhi jo apna na ho saka tha usi ko apna bana raha hun

jo sust baiThi hain aarzuen main un ke shane hila raha hun

jo thak ke jazbaat so rahe hain unhen main phir se jaga raha hun

hawaen ho jaengi muKHalif nahin mujhe is ki koi parwa

lahu ki bunden gira gira kar main apna gulshan saja raha hun

main dushmani ke qarib ja kar talash karta hun dosti ko

jo mujh se nafrat barat rahe hain unhen main apna bana raha hun

sitam tumhaara jafa tumhaari jo yaad aane lage hain mujh ko

guman kuchh aisa ho raha hai tumhein bhi main yaad aa raha hun

nahin hai hairat ki baat koi ye zarf mera hai meri jurat

hai jis jagah bijliyon ki kasrat wahin nasheman bana raha hun

main jaanta hun wajud phulon ka aur kanTon ka hai chaman mein

main phul bhi chun raha hun aur KHar se bhi daman bacha raha hun

tumhaare kaam aaega hamesha ye tohfa-e-dil qubul kar lo

tumhaara chehra dikhane tum ko ek aaina sath la raha hun

jo mera andaz-e-guftugu hai wahi hai ijz-e-mohabbat 'akmal'

ghazal ke parde mein aaj afsana apna un ko suna raha hun