naqab-e-ruKH uTha kar husn jab jalwa-figan hoga

naqāb-e-ruḳh uThā kar husn jab jalva-figan hogā

na pūchho kyā qayāmat-ḳhez rañg-e-anjuman hogā

na gul hañste na kaliyāñ muskurātīñ phir bahārāñ meñ

ḳhabar hotī agar un ko ḳhizāñ-ḳhurda chaman hogā

ġharīq-e-bahr honā aadmī ke haq meñ behtar hai

na mamnūn-e-zamīñ hogā na muhtāj-e-kafan hogā

jafā Dhāte raheñge bas yūñhī din-rāt dar-parda

samajh baiThe haiñ vo badnām to charḳh-e-kuhan hogā

safar meñ bhī musāfir ke bahalne ko ba-ḳhāmoshī

kabhī ahbāb kā qissa kabhī zikr-e-vatan hogā

abhī to patte patte par bahāreñ TuuTī paḌtīñ haiñ

ḳhudā jaane hamāre ba.ad kyā rañg-e-chaman hogā

ajal jab chhīn legī aadmī se tāb-e-goyā.ī

sukūt-e-der-pā hoñToñ pe phir jā-e-suḳhan hogā

kise ma.alūm thā yuuñ dil kī himmat saath chhoḌegī

fanā ḳhud apne teshe se bil-āḳhir kohkan hogā

ḳhudā ke ghar bhī yuuñ to be-talab jaatā nahīñ koī

bulāoge to haañ 'rif.at' sharīk-e-anjuman hogā

naqab-e-ruKH uTha kar husn jab jalwa-figan hoga

na puchho kya qayamat-KHez rang-e-anjuman hoga

na gul hanste na kaliyan muskuraatin phir bahaaran mein

KHabar hoti agar un ko KHizan-KHurda chaman hoga

ghariq-e-bahr hona aadmi ke haq mein behtar hai

na mamnun-e-zamin hoga na muhtaj-e-kafan hoga

jafa Dhate rahenge bas yunhi din-raat dar-parda

samajh baiThe hain wo badnam to charKH-e-kuhan hoga

safar mein bhi musafir ke bahalne ko ba-KHamoshi

kabhi ahbab ka qissa kabhi zikr-e-watan hoga

abhi to patte patte par bahaaren TuTi paDtin hain

KHuda jaane hamare baad kya rang-e-chaman hoga

ajal jab chhin legi aadmi se tab-e-goyai

sukut-e-der-pa honTon pe phir ja-e-suKHan hoga

kise malum tha yun dil ki himmat sath chhoDegi

fana KHud apne teshe se bil-aKHir kohkan hoga

KHuda ke ghar bhi yun to be-talab jata nahin koi

bulaoge to han 'rifat' sharik-e-anjuman hoga