naqsh-bar-ab thi jo dam-o-diram ne baKHshi

naqsh-bar-āb thī jo dām-o-diram ne baḳhshī

ziist ko daulat-e-nāyāb to ġham ne baḳhshī

ahl-e-dastār na arbāb-e-karam ne baḳhshī

izzat-e-nafs mujhe lauh-o-qalam ne baḳhshī

ābyārī na huī āb-e-guhar se us kī

naḳhl-e-irfāñ ko numū dīda-e-nam ne baḳhshī

varna kyā un meñ thā ik jazba-e-hairāñ ke sivā

terī āñkhoñ ko ye goyā.ī to ham ne baḳhshī

umr bhar ham ko mayassar rahī betābī-e-dil

jo ḳhudā ne nahīñ baḳhshī vo sanam ne baḳhshī

jis ne pāmard rakhā ham ko sitamgar ke ḳhilāf

vo azīmat hameñ ḳhud us ke sitam ne baḳhshī

kitnī be-faiz virāsat hai vo tārīḳh-e-ziyāñ

jo hameñ chapqulash-e-dair-o-haram ne baḳhshī

harf-e-tāzī se bhī paayā hai bahut faiz magar

mere iz.hār ko lai sāz-e-ajam ne baḳhshī

naqsh-bar-ab thi jo dam-o-diram ne baKHshi

zist ko daulat-e-nayab to gham ne baKHshi

ahl-e-dastar na arbab-e-karam ne baKHshi

izzat-e-nafs mujhe lauh-o-qalam ne baKHshi

aabyari na hui aab-e-guhar se us ki

naKHl-e-irfan ko numu dida-e-nam ne baKHshi

warna kya un mein tha ek jazba-e-hairan ke siwa

teri aankhon ko ye goyai to hum ne baKHshi

umr bhar hum ko mayassar rahi betabi-e-dil

jo KHuda ne nahin baKHshi wo sanam ne baKHshi

jis ne pamard rakha hum ko sitamgar ke KHilaf

wo azimat hamein KHud us ke sitam ne baKHshi

kitni be-faiz wirasat hai wo tariKH-e-ziyan

jo hamein chapqulash-e-dair-o-haram ne baKHshi

harf-e-tazi se bhi paya hai bahut faiz magar

mere izhaar ko lai saz-e-ajam ne baKHshi