naqsh-e-diwar wo surat bhi gai

naqsh-e-dīvār vo sūrat bhī ga.ī

merī āñkhoñ kī vo vahshat bhī ga.ī

vo diyā bujh gayā mere andar

vo havāoñ se raqābat bhī ga.ī

jāñ-sipārī ke bahut da.ave the

ab to jiine kī nadāmat bhī ga.ī

sa.ī-e-āsūdgī-e-vasl to kyā

girya-e-shab kī vo fursat bhī ga.ī

din ko saa.e se to kuchh saath bhī the

raat ko phir ye rifāqat bhī ga.ī

jin se zinda the zamīr-o-ehsās

ab vo andar kī malāmat bhī ga.ī

sar bhī rusvā haiñ ki saudā na rahā

sañg-e-dīvār kī izzat bhī ga.ī

naqsh-e-diwar wo surat bhi gai

meri aankhon ki wo wahshat bhi gai

wo diya bujh gaya mere andar

wo hawaon se raqabat bhi gai

jaan-sipari ke bahut dawe the

ab to jine ki nadamat bhi gai

sai-e-asudgi-e-wasl to kya

girya-e-shab ki wo fursat bhi gai

din ko sae se to kuchh sath bhi the

raat ko phir ye rifaqat bhi gai

jin se zinda the zamir-o-ehsas

ab wo andar ki malamat bhi gai

sar bhi ruswa hain ki sauda na raha

sang-e-diwar ki izzat bhi gai