naqsh guzre hue lamhon ke hain dil par kya kya

naqsh guzre hue lamhoñ ke haiñ dil par kyā kyā

muḌ ke dekhūñ to nazar aate haiñ manzar kyā kyā

kitne chehroñ pe rahe aks mirī hairat ke

mehrbāñ mujh pe hue ā.īna-paikar kyā kyā

vaqt kaTtā rahā mai-ḳhāne kī rātoñ kī tarah

rahe gardish meñ ye din raat ke sāġhar kyā kyā

chashm-e-ḳhūbāñ ke ishāroñ pe thā jiinā marnā

roz bante the bigaḌte the muqaddar kyā kyā

paañv uThte the usī manzil-e-vahshat kī taraf

raah takte the jahāñ raah ke patthar kyā kyā

rahguzar dil kī na pal-bhar ko bhī sunsān huī

qāfile ġham ke guzarte rahe aksar kyā kyā

āzrāna the mirī vahshat-e-dil ke sab rañg

shaam se sub.h talak Dhalte the paikar kyā kyā

aur ab haal hai ye ḳhud se jo miltā huuñ kabhī

khol detā huuñ shikāyāt ke daftar kyā kyā

naqsh guzre hue lamhon ke hain dil par kya kya

muD ke dekhun to nazar aate hain manzar kya kya

kitne chehron pe rahe aks meri hairat ke

mehrban mujh pe hue aaina-paikar kya kya

waqt kaTta raha mai-KHane ki raaton ki tarah

rahe gardish mein ye din raat ke saghar kya kya

chashm-e-KHuban ke ishaaron pe tha jina marna

roz bante the bigaDte the muqaddar kya kya

panw uThte the usi manzil-e-wahshat ki taraf

rah takte the jahan rah ke patthar kya kya

rahguzar dil ki na pal-bhar ko bhi sunsan hui

qafile gham ke guzarte rahe aksar kya kya

aazrana the meri wahshat-e-dil ke sab rang

sham se subh talak Dhalte the paikar kya kya

aur ab haal hai ye KHud se jo milta hun kabhi

khol deta hun shikayat ke daftar kya kya