narghe mein ghaTaon ke raha hai na rahega

narġhe meñ ghaTāoñ ke rahā hai na rahegā

ḳhurshed mohabbat kā chhupā hai na chhupegā

ho jaate haiñ nākām ḳhirad-mandoñ ke fitne

sar-e-ahl-e-junūñ kā na jhukā hai na jhukegā

tum kyuuñ ho pareshān ki taqdīr kā likkhā

duniyā ke miTāne se miTā hai na miTegā

tarkash se takabbur ke jo itrā ke chalā hai

vo tiir nishāne pe lagā hai na lagegā

tālīm-o-hunar hī vo ḳhazāna hai jo ab tak

daulat ke luTeroñ se luTā hai na luTegā

ho jaatā hai fauran jo pashemān ḳhatā par

nazroñ se azīzoñ kī girā hai na giregā

mansab jahāñ zālim ke asar meñ ho vahāñ par

mazlūm ko insāf milā hai na milegā

hājat se ziyāda kī talab sab ko hai 'tālib'

qismat se sivā phir bhī milā hai na milegā

narghe mein ghaTaon ke raha hai na rahega

KHurshed mohabbat ka chhupa hai na chhupega

ho jate hain nakaam KHirad-mandon ke fitne

sar-e-ahl-e-junun ka na jhuka hai na jhukega

tum kyun ho pareshan ki taqdir ka likkha

duniya ke miTane se miTa hai na miTega

tarkash se takabbur ke jo itra ke chala hai

wo tir nishane pe laga hai na lagega

talim-o-hunar hi wo KHazana hai jo ab tak

daulat ke luTeron se luTa hai na luTega

ho jata hai fauran jo pasheman KHata par

nazron se azizon ki gira hai na girega

mansab jahan zalim ke asar mein ho wahan par

mazlum ko insaf mila hai na milega

hajat se ziyaada ki talab sab ko hai 'talib'

qismat se siwa phir bhi mila hai na milega