narm shagufta chandni hansta hua kanwal kahun

narm shagufta chāñdnī hañstā huā kañval kahūñ

aisā koī sanam kahāñ jis ke liye ġhazal kahūñ

chāñd ko chehra-e-alam zaḳhm ko ik kañval kahūñ

dil mirā chāhtā hai aaj aisī koī ġhazal kahūñ

tāj-mahal ko marmarīñ jism kī ik ġhazal kahūñ

apnī ġhazal ko nuur kā uḌtā huā mahal kahūñ

jugnū ho yā sitāra ho ashk hai merī aañkh kā

māh-jabīñ ġhazāl ko apnī koī ġhazal kahūñ

aap kī baat chhoḌiye aap to be-misāl haiñ

husn-e-jafā-shi.ār ko kyuuñ na maiñ be-badal kahūñ

din hai farishta maut kā teġh-e-qazā liye hue

ġham kī siyāh raat ko sar pe khaḌī ajal kahūñ

rāh-e-hayāt pur-ḳhatar naqd-e-hayāt muḳhtasar

ishq ko be-asar kahūñ ilm ko be-amal kahūñ

tūl-e-shab-e-firāq se kam the ḳhushī ke māh-o-sāl

vasl kī ek umr ko hijr kā ek pal kahūñ

sach hai agar ki aadmī chāñd pe paañv rakh chukā

taare bhī toḌ saktā hai us ko bhī muhtamal kahūñ

fikr kī ye nazākateñ sher kī ye latāfateñ

husn kā ik asar kahūñ ishq kā ik amal kahūñ

sard anā kī kashmakash shām-e-firāq ban ga.ī

vo hai agar ba-zid to kyā 'rāz' ko bhī aTal kahūñ

narm shagufta chandni hansta hua kanwal kahun

aisa koi sanam kahan jis ke liye ghazal kahun

chand ko chehra-e-alam zaKHm ko ek kanwal kahun

dil mera chahta hai aaj aisi koi ghazal kahun

taj-mahal ko marmarin jism ki ek ghazal kahun

apni ghazal ko nur ka uDta hua mahal kahun

jugnu ho ya sitara ho ashk hai meri aankh ka

mah-jabin ghazal ko apni koi ghazal kahun

aap ki baat chhoDiye aap to be-misal hain

husn-e-jafa-shiar ko kyun na main be-badal kahun

din hai farishta maut ka tegh-e-qaza liye hue

gham ki siyah raat ko sar pe khaDi ajal kahun

rah-e-hayat pur-KHatar naqd-e-hayat muKHtasar

ishq ko be-asar kahun ilm ko be-amal kahun

tul-e-shab-e-firaq se kam the KHushi ke mah-o-sal

wasl ki ek umr ko hijr ka ek pal kahun

sach hai agar ki aadmi chand pe panw rakh chuka

tare bhi toD sakta hai us ko bhi muhtamal kahun

fikr ki ye nazakaten sher ki ye latafaten

husn ka ek asar kahun ishq ka ek amal kahun

sard ana ki kashmakash sham-e-firaq ban gai

wo hai agar ba-zid to kya 'raaz' ko bhi aTal kahun