nashat-e-hasti-e-fani ki justuju kya hai

nashāt-e-hastī-e-fānī kī justujū kyā hai

jo be-sabāt hai phir us kī aarzū kyā hai

fanā kā zā.iqa chakhnā paḌegā har shai ko

ye husn-e-zīst ye duniyā-e-rang-o-bū kyā hai

milegā ḳhaak meñ terā ġhurūr bhī zālim

baḌe baḌoñ ko zamīñ khā ga.ī hai tū kyā hai

talāsh-e-yār meñ sahrā-navardiyāñ kaisī

jo dil ke paas hai phir us kī justujū kyā hai

jamāl-e-yār kī tujh se misāl kaise duuñ

falak ke chāñd tirā husn kyā hai tū kyā hai

zarā sī baat pe bah jaa.eñ ḳhuun kī nadiyāñ

koī batā.e yahāñ qīmat-e-lahū kyā hai

badan ko noch lo badle meñ roTiyāñ de do

shikam kī bhuuk ke aage ye aabrū kyā hai

haiñ ab bhī aise musalmāñ jo jānte hī nahīñ

namāz roza kise kahte haiñ vuzū kyā hai

diloñ meñ jazba-e-aḳhlāq ho to baat bane

zabāñ se amn kī be-faiz guftugū kyā hai

talāsh karnā phir auroñ ke aib ko 'ahsan'

tū pahle jaan le anjām-e-aib-jū kyā hai

nashat-e-hasti-e-fani ki justuju kya hai

jo be-sabaat hai phir us ki aarzu kya hai

fana ka zaiqa chakhna paDega har shai ko

ye husn-e-zist ye duniya-e-rang-o-bu kya hai

milega KHak mein tera ghurur bhi zalim

baDe baDon ko zamin kha gai hai tu kya hai

talash-e-yar mein sahra-nawardiyan kaisi

jo dil ke pas hai phir us ki justuju kya hai

jamal-e-yar ki tujh se misal kaise dun

falak ke chand tera husn kya hai tu kya hai

zara si baat pe bah jaen KHun ki nadiyan

koi batae yahan qimat-e-lahu kya hai

badan ko noch lo badle mein roTiyan de do

shikam ki bhuk ke aage ye aabru kya hai

hain ab bhi aise musalman jo jaante hi nahin

namaz roza kise kahte hain wuzu kya hai

dilon mein jazba-e-aKHlaq ho to baat bane

zaban se amn ki be-faiz guftugu kya hai

talash karna phir auron ke aib ko 'ahsan'

tu pahle jaan le anjam-e-aib-ju kya hai