nashat-e-mai hai ki jam-e-sharab hai kya hai

nashāt-e-mai hai ki jām-e-sharāb hai kyā hai

vo ḳhvāb-e-husn hai yā husn-e-ḳhvāb hai kyā hai

nigār-e-husn-e-ġhazālāñ bahār rāhat-e-jāñ

sahar kā nuur hai vo māhtāb hai kyā hai

havā chalī vahī ḳhushbū-badan kī yaad aa.ī

ye ḳhvāb hai ki haqīqat sarāb hai kyā hai

shab-e-visāl jo guzrī ki tere chehre par

sabā kā lams hai rang-e-hijāb hai kyā hai

ye shām-e-ġham bhī nahīñ yād-e-raftagāñ bhī nahīñ

ajiib sī hai ḳhalish iztirāb hai kyā hai

chaman meñ nik.hat-e-gul hai na ab nasīm-e-bahār

dhuāñ sā phailā huā hai sahāb hai kyā hai

charāġh ab bhī tirī rahguzar meñ jaltā hai

mirī vafā kā sila hai hisāb hai kyā hai

vo shams hai ki sitārā vo chāñd hai ki sahar

vo shaḳhs jān-e-'sabā' hai sarāb hai kyā hai

nashat-e-mai hai ki jam-e-sharab hai kya hai

wo KHwab-e-husn hai ya husn-e-KHwab hai kya hai

nigar-e-husn-e-ghazalan bahaar rahat-e-jaan

sahar ka nur hai wo mahtab hai kya hai

hawa chali wahi KHushbu-badan ki yaad aai

ye KHwab hai ki haqiqat sarab hai kya hai

shab-e-visal jo guzri ki tere chehre par

saba ka lams hai rang-e-hijab hai kya hai

ye sham-e-gham bhi nahin yaad-e-raftagan bhi nahin

ajib si hai KHalish iztirab hai kya hai

chaman mein nikhat-e-gul hai na ab nasim-e-bahaar

dhuan sa phaila hua hai sahab hai kya hai

charagh ab bhi teri rahguzar mein jalta hai

meri wafa ka sila hai hisab hai kya hai

wo shams hai ki sitara wo chand hai ki sahar

wo shaKHs jaan-e-'saba' hai sarab hai kya hai