nashat-e-nau ki talab hai na taza gham ka jigar

nashāt-e-nau kī talab hai na taaza ġham kā jigar

sukūñ-girafta ko kaise ho zer-o-bam kā jigar

agarche tishna-nigāhī misāl-e-sahrā hai

nahīñ hai dast-e-duā ko tire karam kā jigar

jigar ko ishq ne faulād kar diyā hai jab

nahīñ rahā hai sitam-kār ko sitam kā jigar

hai iztirāb-e-jigar lahr lahr par bhārī

kahāñ hai bahr ko is tarah pech-o-ḳham kā jigar

ye kaam top tapanche ke dā.ere kā nahīñ

futūh-e-fikr-o-nazar to hai bas qalam kā jigar

hamāre māthe meñ rakh dī hai daas kī sī sarisht

use ḳhudā ne diyā hai kisī sanam kā jigar

hamārī chaah meñ roī hai zindagī itnā

ki paanī paanī huā jā rahā hai sam kā jigar

jigar kā dam hai ki gard-e-zamīñ se TūTtā hai

agarche toḌ na paayā falak bhī dam kā jigar

bas 'āzam' aaj to had hī ḳhumār ne kar dī

kahīñ se ghol ke le aao tair-e-ram kā jigar

nashat-e-nau ki talab hai na taza gham ka jigar

sukun-girafta ko kaise ho zer-o-bam ka jigar

agarche tishna-nigahi misal-e-sahra hai

nahin hai dast-e-dua ko tere karam ka jigar

jigar ko ishq ne faulad kar diya hai jab

nahin raha hai sitam-kar ko sitam ka jigar

hai iztirab-e-jigar lahr lahr par bhaari

kahan hai bahr ko is tarah pech-o-KHam ka jigar

ye kaam top tapanche ke daere ka nahin

futuh-e-fikr-o-nazar to hai bas qalam ka jigar

hamare mathe mein rakh di hai das ki si sarisht

use KHuda ne diya hai kisi sanam ka jigar

hamari chah mein roi hai zindagi itna

ki pani pani hua ja raha hai sam ka jigar

jigar ka dam hai ki gard-e-zamin se TuTta hai

agarche toD na paya falak bhi dam ka jigar

bas 'azam' aaj to had hi KHumar ne kar di

kahin se ghol ke le aao tair-e-ram ka jigar