nashat-e-wasl ke hangame kab nahin rakhta

nashāt-e-vasl ke hangāme kab nahīñ rakhtā

maiñ koī shai bhī yahāñ be-talab nahīñ rakhtā

mujhe pata haiñ tirī barhamī ke saare sabab

mujhe ḳhabar hai tū kuchh be-sabab nahīñ rakhtā

hamārā yaar hai hassās is mu’āmle meñ

adab ke saath koī be-adab nahīñ rakhtā

hamesha husn ko dekhā gayā hai dād-talab

magar vo husn to koī talab nahīñ rakhtā

fasīl-e-dil kī muñDeroñ pe vo charāġh mire

jab us kī chaah nahīñ hotī tab nahīñ rakhtā

junūñ-nazhād hai timsāl-e-ā.ina merā

so apne aap meñ kyā kyā ġhazab nahīñ rakhtā

use ḳhabar hai ki rakhnā hai kyā nahīñ rakhnā

so jo bhī haath lage sab kā sab nahīñ rakhtā

nashat-e-wasl ke hangame kab nahin rakhta

main koi shai bhi yahan be-talab nahin rakhta

mujhe pata hain teri barhami ke sare sabab

mujhe KHabar hai tu kuchh be-sabab nahin rakhta

hamara yar hai hassas is mu’amle mein

adab ke sath koi be-adab nahin rakhta

hamesha husn ko dekha gaya hai dad-talab

magar wo husn to koi talab nahin rakhta

fasil-e-dil ki munDeron pe wo charagh mere

jab us ki chah nahin hoti tab nahin rakhta

junun-nazhad hai timsal-e-aina mera

so apne aap mein kya kya ghazab nahin rakhta

use KHabar hai ki rakhna hai kya nahin rakhna

so jo bhi hath lage sab ka sab nahin rakhta