nashat usne ajab qurb ki nichhawar ki

nashāt us ne ajab qurb kī nichhāvar kī

khaḌī thī biich meñ dīvār dil ke andar kī

maiñ kirchiyoñ kī chubhan umr bhar sameTūñgā

ki dil ne shīshe pe khaa.ī hai choT patthar kī

hinā.ī shaam dar-o-bām tap se jaate haiñ

kahāñ utārne jā.ūñ thakān din bhar kī

khaḌī huī mire chāroñ taraf haiñ dīvāreñ

nikal ke jaa.e ghuTan kis taraf se andar kī

maiñ jugnuoñ ke ta.āqub meñ sub.h tak bhāgā

nazar meñ phailī rahī tīrgī muqaddar kī

havā ke saath utartī nahīñ nasheboñ meñ

zamīñ se kitnī hai ūñchī satah samundar kī

nashat us ne ajab qurb ki nichhawar ki

khaDi thi bich mein diwar dil ke andar ki

main kirchiyon ki chubhan umr bhar sameTunga

ki dil ne shishe pe khai hai choT patthar ki

hinai sham dar-o-baam tap se jate hain

kahan utarne jaun thakan din bhar ki

khaDi hui mere chaaron taraf hain diwaren

nikal ke jae ghuTan kis taraf se andar ki

main jugnuon ke taaqub mein subh tak bhaga

nazar mein phaili rahi tirgi muqaddar ki

hawa ke sath utarti nahin nashebon mein

zamin se kitni hai unchi satah samundar ki