nashili chhanw mein bite hue zamanon ko

nashīlī chhāñv meñ biite hue zamānoñ ko

lagā do aag ajal ke nigār-ḳhānoñ ko

batā rahe haiñ jabīn-e-hayāt ke tevar

panāh mil nahīñ saktī ab āstānoñ ko

diye jalāo ki insāniyat ne toḌ diyā

jahān-e-zar ke rū-pahle tilism-ḳhānoñ ko

har ek gaam pe mash.al dikhā rahī hai hayāt

sitam kī aañch meñ nikhre hue zamānoñ ko

hazār dār-o-rasan Dagmagā nahīñ sakte

ajal kī god meñ khele hue javānoñ ko

bahut qarīb hai vo daur ḳhush-gavār ki jab

nigār-e-amn sajā.egī kār-ḳhānoñ ko

ḳhud aage baḌh ke qadam chūmtī hai manzil-e-shauq

ye kis ne raah dikhā.ī hai kārvānoñ ko

nashili chhanw mein bite hue zamanon ko

laga do aag ajal ke nigar-KHanon ko

bata rahe hain jabin-e-hayat ke tewar

panah mil nahin sakti ab aastanon ko

diye jalao ki insaniyat ne toD diya

jahan-e-zar ke ru-pahle tilism-KHanon ko

har ek gam pe mashal dikha rahi hai hayat

sitam ki aanch mein nikhre hue zamanon ko

hazar dar-o-rasan Dagmaga nahin sakte

ajal ki god mein khele hue jawanon ko

bahut qarib hai wo daur KHush-gawar ki jab

nigar-e-amn sajaegi kar-KHanon ko

KHud aage baDh ke qadam chumti hai manzil-e-shauq

ye kis ne rah dikhai hai karwanon ko