nashsha hai teri nigahon mein sharabon ki tarah

nashsha hai terī nigāhoñ meñ sharāboñ kī tarah

log sarshār haiñ be-ḳhud haiñ ḳharāboñ kī tarah

chāñd par chhā.e hue halke se kaale bādal

mujh ko lagte haiñ tire ruḳh pe naqāboñ kī tarah

sāya-e-zulf meñ guzre hue vo shām-o-sahar

aaj bhī yaad haiñ TuuTe hue ḳhvāboñ kī tarah

apne dāman meñ chhupā le mire aañsū koī

ye guhar TuuT bhī jaate haiñ habāboñ kī tarah

ehtiyāt-e-nigah-e-nāz to dekhe koī

mujh pe hotā hai karam bhī to itāboñ kī tarah

jāniyegā ki nahīñ dard-e-mohabbat jin meñ

dil vo be-jān se haiñ TuuTe rabāboñ kī tarah

kaise bhūleñ unheñ duniyā ki vafā ke qisse

jāvedāñ hote haiñ maz.hab kī kitāboñ kī tarah

shaiḳh kis shaan se piite haiñ mai-e-nāb-e-tahūr

phir bhī badnām nahīñ ham se ḳharāboñ kī tarah

aaj bhī pyaar kī rāhoñ meñ bichhaḌ kar tujh se

DhūñDhtā huuñ maiñ tujhe ḳhāna-ḳharāboñ kī tarah

jurm-e-ulfat pe 'zafar' mujh ko nadāmat kyoñ ho

ye vo laġhzish hai jo afzal hai savāboñ kī tarah

nashsha hai teri nigahon mein sharabon ki tarah

log sarshaar hain be-KHud hain KHarabon ki tarah

chand par chhae hue halke se kale baadal

mujh ko lagte hain tere ruKH pe naqabon ki tarah

saya-e-zulf mein guzre hue wo sham-o-sahar

aaj bhi yaad hain TuTe hue KHwabon ki tarah

apne daman mein chhupa le mere aansu koi

ye guhar TuT bhi jate hain hababon ki tarah

ehtiyat-e-nigah-e-naz to dekhe koi

mujh pe hota hai karam bhi to itabon ki tarah

jaaniyega ki nahin dard-e-mohabbat jin mein

dil wo be-jaan se hain TuTe rababon ki tarah

kaise bhulen unhen duniya ki wafa ke qisse

jawedan hote hain mazhab ki kitabon ki tarah

shaiKH kis shan se pite hain mai-e-nab-e-tahur

phir bhi badnam nahin hum se KHarabon ki tarah

aaj bhi pyar ki rahon mein bichhaD kar tujh se

DhunDhta hun main tujhe KHana-KHarabon ki tarah

jurm-e-ulfat pe 'zafar' mujh ko nadamat kyon ho

ye wo laghzish hai jo afzal hai sawabon ki tarah