nashshe mein jo hai kohna sharabon se ziyaada

nashshe meñ jo hai kohna sharāboñ se ziyāda

us jism kī ḳhushbū hai gulāboñ se ziyāda

ik qatra-e-shabnam ko taraste haiñ gulistāñ

ye fasl to mumsik hai sarāboñ se ziyāda

paḌhnā hai to insān ko paḌhne kā hunar siikh

har chehre pe likkhā hai kitāboñ se ziyāda

pahuñchā huuñ vahīñ par ki chalā thā maiñ jahāñ se

hastī kā safar bhī nahīñ ḳhvāboñ se ziyāda

ye bikhrī huī zindagī yakjā nahīñ hotī

kam hone pe bhī ham haiñ ḳharāboñ se ziyāda

'fāriġh' kabhī ghaTtī hī nahīñ dard kī daulat

hotī hai hamesha ye hisāboñ se ziyāda

nashshe mein jo hai kohna sharabon se ziyaada

us jism ki KHushbu hai gulabon se ziyaada

ek qatra-e-shabnam ko taraste hain gulistan

ye fasl to mumsik hai sarabon se ziyaada

paDhna hai to insan ko paDhne ka hunar sikh

har chehre pe likkha hai kitabon se ziyaada

pahuncha hun wahin par ki chala tha main jahan se

hasti ka safar bhi nahin KHwabon se ziyaada

ye bikhri hui zindagi yakja nahin hoti

kam hone pe bhi hum hain KHarabon se ziyaada

'farigh' kabhi ghaTti hi nahin dard ki daulat

hoti hai hamesha ye hisabon se ziyaada