nashtar-e-gham jo rag-e-jaan mein utar jata hai

nashtar-e-ġham jo rag-e-jāñ meñ utar jaatā hai

aur kuchh hausla-e-shauq nikhar jaatā hai

haal bīmār kā kuchh Thiik nahīñ hai shāyad

jo bhī aatā hai dabe paañv guzar jaatā hai

ehtiyāt un ko sar-e-bazm na mil jaa.e nazar

aur mujhe ġham hai ki nāmūs-e-nazar jaatā hai

rahrav-e-rāh-e-mohabbat kā sahārā hai yahī

ġham jo jaatā hai to sāmān-e-safar jaatā hai

fitna-e-dair ho yā zulf-e-pareshān-e-butāñ

jo bhī ilzām hai dīvāne ke sar jaatā hai

merā afsāna-e-ġham tere taġhāful ke tufail

rang laatā hai nikhartā hai sañvar jaatā hai

us kī mahfil se chale aa.e anā le ke 'shakeb'

dekhiye ab dil-e-ḳhuddār kidhar jaatā hai

nashtar-e-gham jo rag-e-jaan mein utar jata hai

aur kuchh hausla-e-shauq nikhar jata hai

haal bimar ka kuchh Thik nahin hai shayad

jo bhi aata hai dabe panw guzar jata hai

ehtiyat un ko sar-e-bazm na mil jae nazar

aur mujhe gham hai ki namus-e-nazar jata hai

rahraw-e-rah-e-mohabbat ka sahaara hai yahi

gham jo jata hai to saman-e-safar jata hai

fitna-e-dair ho ya zulf-e-pareshan-e-butan

jo bhi ilzam hai diwane ke sar jata hai

mera afsana-e-gham tere taghaful ke tufail

rang lata hai nikharta hai sanwar jata hai

us ki mahfil se chale aae ana le ke 'shakeb'

dekhiye ab dil-e-KHuddar kidhar jata hai