nashtar ki nok dil mein utare chale gae

nashtar kī nok dil meñ utāre chale ga.e

ham yuuñ urūs-e-ġham ko sañvāre chale ga.e

aaya na haath gosha-e-dāmān-e-iltifāt

lekin faqīr haath pasāre chale ga.e

qaa.em raheñ ba-vasf-e-karam bhī hudūd-e-nāz

dariyā ke saath saath kināre chale ga.e

dil ko tumhīñ ne haath meñ le kar masal diyā

ham sāda-dil tumhīñ ko pukāre chale ga.e

chalnā rah-e-hayāt pe dushvār thā magar

tere matā-e-ġham ke sahāre chale ga.e

aaya tirā ḳhayāl miTe naqsh-e-mā-sivā

ubhrā ufuq se chāñd sitāre chale ga.e

mahfil ko nāgavār thī arz-e-shikast-e-dil

mahfil se uTh ke dard ke maare chale ga.e

haañ ai zamīn-e-gor-e-ġharībāñ javāb de

kyoñ mujh se ruuTh kar mire pyāre chale ga.e

'ābid' zamāna ham ko miTātā chalā gayā

ham naqsh-e-zindagī ko ubhāre chale ga.e

nashtar ki nok dil mein utare chale gae

hum yun urus-e-gham ko sanware chale gae

aaya na hath gosha-e-daman-e-iltifat

lekin faqir hath pasare chale gae

qaem rahen ba-wasf-e-karam bhi hudud-e-naz

dariya ke sath sath kinare chale gae

dil ko tumhin ne hath mein le kar masal diya

hum sada-dil tumhin ko pukare chale gae

chalna rah-e-hayat pe dushwar tha magar

tere mata-e-gham ke sahaare chale gae

aaya tera KHayal miTe naqsh-e-ma-siwa

ubhra ufuq se chand sitare chale gae

mahfil ko nagawar thi arz-e-shikast-e-dil

mahfil se uTh ke dard ke mare chale gae

han ai zamin-e-gor-e-ghariban jawab de

kyon mujh se ruTh kar mere pyare chale gae

'abid' zamana hum ko miTata chala gaya

hum naqsh-e-zindagi ko ubhaare chale gae