nasib-e-ishq masarrat kabhi nahin hoti

nasīb-e-ishq masarrat kabhī nahīñ hotī

ye bazm vo hai jahāñ raushnī nahīñ hotī

jabīn-e-ishq ke sajde qubūl hote haiñ

mizāj-e-husn meñ jab barhamī nahīñ hotī

samajh chuke haiñ asīrī ko ham payām-e-ajal

ki zindagi-e-qafas zindagī nahīñ hotī

mire baġhair unheñ kaun jaan saktā hai

vo yuuñ guzarte haiñ āvāz bhī nahīñ hotī

tirā sitam bhī to hai ek pursish-e-ḳhāmosh

tirī nigāh kabhī ajnabī nahīñ hotī

baḌhe chalo yahī vāraftagī kī manzil hai

rah-e-talab meñ kabhī shaam hī nahīñ hotī

dil ek ātish-e-ḳhāmosh hī sahī lekin

tumhārī yaad meñ koī kamī nahīñ hotī

mirī nazar meñ yaqīnan vo nañg-e-gulshan hai

amīn-e-rāz-e-chaman jo kalī nahīñ hotī

milī hai rāh-e-talab meñ 'mushīr' sirf mujhe

vo zindagī jo kabhī zindagī nahīñ hotī

nasib-e-ishq masarrat kabhi nahin hoti

ye bazm wo hai jahan raushni nahin hoti

jabin-e-ishq ke sajde qubul hote hain

mizaj-e-husn mein jab barhami nahin hoti

samajh chuke hain asiri ko hum payam-e-ajal

ki zindagi-e-qafas zindagi nahin hoti

mere baghair unhen kaun jaan sakta hai

wo yun guzarte hain aawaz bhi nahin hoti

tera sitam bhi to hai ek pursish-e-KHamosh

teri nigah kabhi ajnabi nahin hoti

baDhe chalo yahi waraftagi ki manzil hai

rah-e-talab mein kabhi sham hi nahin hoti

dil ek aatish-e-KHamosh hi sahi lekin

tumhaari yaad mein koi kami nahin hoti

meri nazar mein yaqinan wo nang-e-gulshan hai

amin-e-raaz-e-chaman jo kali nahin hoti

mili hai rah-e-talab mein 'mushir' sirf mujhe

wo zindagi jo kabhi zindagi nahin hoti