nasib jin ka jahan tha wahin pe utre hain

nasīb jin kā jahāñ thā vahīñ pe utre haiñ

zamīñ ke the jo parinde zamīñ pe utre haiñ

fazā meñ tair rahī hai vafāoñ kī ḳhushbū

zarūr hans ke joḌe kahīñ pe utre haiñ

tumhārī bazm ko dekhā to ye huā mahsūs

ki jaise chāñd sitāre zamīñ pe utre haiñ

mujhe yaqīñ thā parinde bhaTak nahīñ sakte

isī liye jahāñ chāhā vahīñ pe utre haiñ

du'ā.eñ maañ kī abhī ḳhatm bhī na ho pā.īñ

lagā farishte falak se zamīñ pe utre haiñ

azaab aa.e haiñ jitne zamīn-e-ulfat par

karam bhī is se ziyāda yahīñ pe utre haiñ

lagā.eñ shauq se label vo pyaar kā haq hai

agar vo puure diloñ ke yaqīñ pe utre haiñ

nasib jin ka jahan tha wahin pe utre hain

zamin ke the jo parinde zamin pe utre hain

faza mein tair rahi hai wafaon ki KHushbu

zarur hans ke joDe kahin pe utre hain

tumhaari bazm ko dekha to ye hua mahsus

ki jaise chand sitare zamin pe utre hain

mujhe yaqin tha parinde bhaTak nahin sakte

isi liye jahan chaha wahin pe utre hain

du'aen man ki abhi KHatm bhi na ho pain

laga farishte falak se zamin pe utre hain

azab aae hain jitne zamin-e-ulfat par

karam bhi is se ziyaada yahin pe utre hain

lagaen shauq se label wo pyar ka haq hai

agar wo pure dilon ke yaqin pe utre hain