nasihat se meri ye sau kos bhage

nasīhat se merī ye sau kos bhāge

tilañgoñ kī haq meñ jaise bhūtiyā hai

maiñ baiThūñ zamīñ par ye baiThe samāñ par

kujā taḳht-e-shāhī kujā boriyā hai

kareñ jā-ba-jā log par kā kabūtar

har ik baat kā mach rahā tūtiyā hai

zamāne kā ye haal aur dil kā ye haal

kaho kis tarah rahtī sharm aur hayā hai

bhañvar biich ġham ke maiñ Dāloñ aur uchhlūñ

ye kahtā hai mujh se ki tū marjiyā hai

maiñ sau sau dafa terā phāḌā garebāñ

batā tū ne kis se vāste phir siyā hai

tū hai maut kā Dher mat bol mujh se

amar huuñ maiñ ne aab āb-e-haivāñ piyā hai

mere saanī na.ī hai koī ab jahāñ meñ

falak ke kañgūroñ ko maiñ ne chhiyā hai

ḳhudā huuñ sadā 'āshiqī par maiñ usī kī

vo jo qais sahrā meñ ek ho gayā hai

ḳhudā kī taraf jin ne dil ko lagāyā

huā faz us ke se vo ambiyā hai

mire jī meñ āvegī so hī karūñgā

maiñ muḳhtār huuñ merā karam ḳhurda hai

suneñ dil ke muñh se maiñ jab aisī bāteñ

ḳhudā shāhid hai maiñ ne ro ro diyā hai

phir āḳhir ho lāchār meñ haar baiThā

ye laḌne ke ta.iiñ miir ḳhaañ Thokiyā hai

kahūñ kyā kyā yaaro maiñ dil ke tamāshe

ye to svāñg laane ko bahrūpiyā hai

na bik aage ab 'nayan' ḳhāmosh ho rā

ye dil hai terā yaar lañgoTiyā hai

nasihat se meri ye sau kos bhage

tilangon ki haq mein jaise bhutiya hai

main baiThun zamin par ye baiThe saman par

kuja taKHt-e-shahi kuja boriya hai

karen ja-ba-ja log par ka kabutar

har ek baat ka mach raha tutiya hai

zamane ka ye haal aur dil ka ye haal

kaho kis tarah rahti sharm aur haya hai

bhanwar bich gham ke main Dalon aur uchhlun

ye kahta hai mujh se ki tu marjiya hai

main sau sau dafa tera phaDa gareban

bata tu ne kis se waste phir siya hai

tu hai maut ka Dher mat bol mujh se

amar hun main ne aab aab-e-haiwan piya hai

mere sani nai hai koi ab jahan mein

falak ke kanguron ko main ne chhiya hai

KHuda hun sada 'ashiqi par main usi ki

wo jo qais sahra mein ek ho gaya hai

KHuda ki taraf jin ne dil ko lagaya

hua faz us ke se wo ambiya hai

mere ji mein aawegi so hi karunga

main muKHtar hun mera karam KHurda hai

sunen dil ke munh se main jab aisi baaten

KHuda shahid hai main ne ro ro diya hai

phir aaKHir ho lachaar mein haar baiTha

ye laDne ke tain mir KHan Thokiya hai

kahun kya kya yaro main dil ke tamashe

ye to swang lane ko bahrupiya hai

na bik aage ab 'nayan' KHamosh ho ra

ye dil hai tera yar langoTiya hai