nasim-e-ku-e-yar aae na aae

nasīm-e-kū-e-yār aa.e na aa.e

ḳhudā jaane bahār aa.e na aa.e

tasallī aaj to tum de rahe ho

magar kal phir qarār aa.e na aa.e

nazar bhar dekh le tū ai nazar aaj

nazar phir rū-e-yār aa.e na aa.e

lagā le siine se ai dil ki kal kī

ḳhabar kyā us ko pyaar aa.e na aa.e

ḳhabar us ko nahīñ lekin yahāñ maiñ

huuñ mahv-e-intizār aa.e na aa.e

mire bas meñ nahīñ us ko bulānā

hai us ko iḳhtiyār aa.e na aa.e

gulistāñ kī bahāreñ kahtī haiñ aaj

ki kal jān-e-bahār aa.e na aa.e

hamesha jiit ke sehre mile haiñ

gale meñ phir ye haar aa.e na aa.e

dil-e-dīvāna jaldī aur jaldī

ki phir ye daur-e-dār aa.e na aa.e

mirī to ḳhaak ab ban ban uḌegī

tire dil meñ ġhubār aa.e na aa.e

qadam dhīre uThā nādān 'rahbar'

ki phir ye rahguzār aa.e na aa.e

nasim-e-ku-e-yar aae na aae

KHuda jaane bahaar aae na aae

tasalli aaj to tum de rahe ho

magar kal phir qarar aae na aae

nazar bhar dekh le tu ai nazar aaj

nazar phir ru-e-yar aae na aae

laga le sine se ai dil ki kal ki

KHabar kya us ko pyar aae na aae

KHabar us ko nahin lekin yahan main

hun mahw-e-intizar aae na aae

mere bas mein nahin us ko bulana

hai us ko iKHtiyar aae na aae

gulistan ki bahaaren kahti hain aaj

ki kal jaan-e-bahaar aae na aae

hamesha jit ke sehre mile hain

gale mein phir ye haar aae na aae

dil-e-diwana jaldi aur jaldi

ki phir ye daur-e-dar aae na aae

meri to KHak ab ban ban uDegi

tere dil mein ghubar aae na aae

qadam dhire uTha nadan 'rahbar'

ki phir ye rahguzar aae na aae