nasl-e-adam pe wahi jaur-o-sitam aaj bhi hai

nasl-e-ādam pe vahī jaur-o-sitam aaj bhī hai

aur ye tafraqa-e-dair-o-haram aaj bhī hai

bik chukā kab kā musalmān kā īmān ai dost

kaun kahtā hai ki hindū kā dharam aaj bhī hai

ab vo pahlī sī kashish dil meñ kahāñ se lā.ūñ

ye to sach hai ki tirā lutf-e-karam aaj bhī hai

bazm meñ terī har ik shaḳhs hai shādāñ ai dost

phir bhī ik dil hai jo vābasta-e-ġham aaj bhī hai

zehn se laakh guzar jaa.e tirī yaad magar

dil meñ ehsās tire sar kī qasam aaj bhī hai

Thokareñ raah meñ khaa.ī haiñ hazāroñ lekin

rah-rav-e-ishq kā manzil meñ qadam aaj bhī hai

nasl-e-adam pe wahi jaur-o-sitam aaj bhi hai

aur ye tafraqa-e-dair-o-haram aaj bhi hai

bik chuka kab ka musalman ka iman ai dost

kaun kahta hai ki hindu ka dharam aaj bhi hai

ab wo pahli si kashish dil mein kahan se laun

ye to sach hai ki tera lutf-e-karam aaj bhi hai

bazm mein teri har ek shaKHs hai shadan ai dost

phir bhi ek dil hai jo wabasta-e-gham aaj bhi hai

zehn se lakh guzar jae teri yaad magar

dil mein ehsas tere sar ki qasam aaj bhi hai

Thokaren rah mein khai hain hazaron lekin

rah-raw-e-ishq ka manzil mein qadam aaj bhi hai