naumid-e-karam ho kar mayus-e-dua ho kar

naumīd-e-karam ho kar māyūs-e-duā ho kar

ham baiTh ga.e āḳhir rāzī-ba-razā ho kar

in band guphāoñ se kyoñ ham ko lagāo hai

jin band guphāoñ se aa.e haiñ rihā ho kar

chhūte hī mirā chehra nam kar ga.ī āñkhoñ ko

yādoñ ke samundar se aa.ī thī havā ho kar

kyoñ TūTte rishtoñ par ashk aa ga.e āñkhoñ meñ

hone do agar koī jaatā hai ḳhafā ho kar

tū ne mujhe aise bhī din-rāt dikhā.e haiñ

rah jaatī hai jab duniyā bas ek ḳhalā ho kar

achchhe rahe jo pal pal mausam kī tarah badle

kyā pā liyā ham ne bhī pāband-e-vafā ho kar

dushman pe 'shabāb' apne kyoñ mujh ko na raham aa.e

gaalī mujhe dushman kī lagtī hai duā ho kar

naumid-e-karam ho kar mayus-e-dua ho kar

hum baiTh gae aaKHir raazi-ba-raza ho kar

in band guphaon se kyon hum ko lagao hai

jin band guphaon se aae hain riha ho kar

chhute hi mera chehra nam kar gai aankhon ko

yaadon ke samundar se aai thi hawa ho kar

kyon TuTte rishton par ashk aa gae aankhon mein

hone do agar koi jata hai KHafa ho kar

tu ne mujhe aise bhi din-raat dikhae hain

rah jati hai jab duniya bas ek KHala ho kar

achchhe rahe jo pal pal mausam ki tarah badle

kya pa liya hum ne bhi paband-e-wafa ho kar

dushman pe 'shabab' apne kyon mujh ko na raham aae

gali mujhe dushman ki lagti hai dua ho kar