naya kuchh kar dikhane ka irada Tut jata hai

nayā kuchh kar dikhāne kā irāda Tuut jaatā hai

kisī bachche ke hāthoñ jab khilaunā Tuut jaatā hai

tahammul 'ain vājib hai mohabbat kī sharī'at meñ

agar iftār jaldī ho to roza Tuut jaatā hai

tire mere milan kā ḳhvāb nāzuk aa.ina sā hai

lage āvāz kā patthar to sapnā Tuut jaatā hai

kahāñ Thokar samajhtī hai kisī būḌhe kī lāchārī

vo jab lāThī bachātā hai to chashma Tuut jaatā hai

haqīqat zindagī kī pūchhtā huuñ jab bhī gulshan se

to fauran peḌ kī Tahnī se pattā Tuut jaatā hai

tujhe yaksar bhulāne kā tujhe dil se miTāne kā

irāda jab bhī kartā huuñ irāda Tuut jaatā hai

ye ik beTī samajhtī hai ki us kā ghar basāne ko

mirā būḌhā pidar andar se kitnā Tuut jaatā hai

zamāne-bhar meñ mat tū ghuum le kar zo'm kī chābī

zarā narmī se ye nafrat kā taalā Tuut jaatā hai

javāñ beTe kā lāsha baap jab koī uThātā hai

bhale faulād kā ho phir bhī kāñdhā Tuut jaatā hai

naya kuchh kar dikhane ka irada Tut jata hai

kisi bachche ke hathon jab khilauna Tut jata hai

tahammul 'ain wajib hai mohabbat ki shari'at mein

agar iftar jaldi ho to roza Tut jata hai

tere mere milan ka KHwab nazuk aaina sa hai

lage aawaz ka patthar to sapna Tut jata hai

kahan Thokar samajhti hai kisi buDhe ki lachaari

wo jab laThi bachata hai to chashma Tut jata hai

haqiqat zindagi ki puchhta hun jab bhi gulshan se

to fauran peD ki Tahni se patta Tut jata hai

tujhe yaksar bhulane ka tujhe dil se miTane ka

irada jab bhi karta hun irada Tut jata hai

ye ek beTi samajhti hai ki us ka ghar basane ko

mera buDha pidar andar se kitna Tut jata hai

zamane-bhar mein mat tu ghum le kar zo'm ki chabi

zara narmi se ye nafrat ka tala Tut jata hai

jawan beTe ka lasha bap jab koi uThata hai

bhale faulad ka ho phir bhi kandha Tut jata hai