naya mausam dar aaya dasht mein barg-o-samar jage

nayā mausam dar aayā dasht meñ barg-o-samar jaage

zamānoñ se jo mahv-e-ḳhvāb the qalb-o-nazar jaage

na.e harfoñ ke phūloñ ko sajāyā vaqt ne lab par

na.e harfoñ ke phūloñ meñ na.e kaif-o-asar jaage

vo daur aayā sadā zulm-o-sitam ke bhī ḳhilāf uTThī

hamārī aur tirī duniyā ke arbāb-e-hunar jaage

qayāmat kūcha-o-bāzār meñ yūñhī nahīñ aa.ī

ham apne shahr meñ pahle pas-e-dīvār-o-dar jaage

sivā.e tīrgī hadd-e-nazar tak kuchh na thā 'bedī'

ye ḳhvāhish thī ki sīnoñ meñ tamannā-e-sahar jaage

naya mausam dar aaya dasht mein barg-o-samar jage

zamanon se jo mahw-e-KHwab the qalb-o-nazar jage

nae harfon ke phulon ko sajaya waqt ne lab par

nae harfon ke phulon mein nae kaif-o-asar jage

wo daur aaya sada zulm-o-sitam ke bhi KHilaf uTThi

hamari aur teri duniya ke arbab-e-hunar jage

qayamat kucha-o-bazar mein yunhi nahin aai

hum apne shahr mein pahle pas-e-diwar-o-dar jage

siwae tirgi hadd-e-nazar tak kuchh na tha 'bedi'

ye KHwahish thi ki sinon mein tamanna-e-sahar jage