nazara kar but-e-pur-fan hamara

nazāra kar but-e-pur-fan hamārā

ki tan dāġhoñ se hai gulshan hamārā

hai ishq-e-zulf meñ ḳhāna-badoshī

kaheñ kyā hai kahāñ maskan hamārā

jo ro.e yād-e-dandān-e-sanam meñ

to pur-gauhar huā dāman hamārā

butoñ kī saḳhtiyāñ sahne ko yā-rab

banāyā kyoñ na dil aahan hamārā

hamārī ye vasiyyat hai dam-e-marg

ki kū-e-yār ho madfan hamārā

javānī meñ mohabbat kī lagī aag

jalā kis vaqt meñ ḳhirman hamārā

zamīn-o-āsmāñ tharrā rahe haiñ

sadā-e-sūr hai shevan hamārā

ik āhū-chashm kī ulfat meñ 'sābir'

bayābāñ ho gayā maskan hamārā

nazara kar but-e-pur-fan hamara

ki tan daghon se hai gulshan hamara

hai ishq-e-zulf mein KHana-badoshi

kahen kya hai kahan maskan hamara

jo roe yaad-e-dandan-e-sanam mein

to pur-gauhar hua daman hamara

buton ki saKHtiyan sahne ko ya-rab

banaya kyon na dil aahan hamara

hamari ye wasiyyat hai dam-e-marg

ki ku-e-yar ho madfan hamara

jawani mein mohabbat ki lagi aag

jala kis waqt mein KHirman hamara

zamin-o-asman tharra rahe hain

sada-e-sur hai shewan hamara

ek aahu-chashm ki ulfat mein 'sabir'

bayaban ho gaya maskan hamara