nazar aae nazar walon ko manzar kuchh alag sa

nazar aa.e nazar vāloñ ko manzar kuchh alag sā

uThā tūfān ai sākit samundar kuchh alag sā

jo paayā hotā maiñ ne bhī muqaddar kuchh alag sā

banātā maiñ bhī shahr-e-ishq meñ ghar kuchh alag sā

maiñ fasl-e-gul se begāna magar mujh ko yaqīñ hai

khilegā phuul ik din mere lab par kuchh alag sā

vo dekho ḳhīrgī āñkhoñ kī chuġhlī khā rahī hai

ujālā hai shabistānoñ ke andar kuchh alag sā

ḳhayāl-e-vasl kī behad munavvar sā.atoñ meñ

nazar aatā hai vo mahtāb-paikar kuchh alag sā

maiñ un ujle dinoñ kā muntazir huuñ jaane kab se

samāñ bāñdheñge jab mehrāb-o-mimbar kuchh alag sā

use hairat se shāyad dekhte haiñ aa.ine yuuñ

hai us kā aks ā.īnoñ ke andar kuchh alag sā

hai terī yaad ke rastoñ pe chalnā kitnā bhārī

rakhā ho bojh jaise mere sar par kuchh alag sā

agar vā rakkhī jauhar aap ne chashm-e-basīrat

dikhā.ī degā har saa.e meñ paikar kuchh alag sā

nazar aae nazar walon ko manzar kuchh alag sa

uTha tufan ai sakit samundar kuchh alag sa

jo paya hota main ne bhi muqaddar kuchh alag sa

banata main bhi shahr-e-ishq mein ghar kuchh alag sa

main fasl-e-gul se begana magar mujh ko yaqin hai

khilega phul ek din mere lab par kuchh alag sa

wo dekho KHirgi aankhon ki chughli kha rahi hai

ujala hai shabistanon ke andar kuchh alag sa

KHayal-e-wasl ki behad munawwar saaton mein

nazar aata hai wo mahtab-paikar kuchh alag sa

main un ujle dinon ka muntazir hun jaane kab se

saman bandhenge jab mehrab-o-mimbar kuchh alag sa

use hairat se shayad dekhte hain aaine yun

hai us ka aks aainon ke andar kuchh alag sa

hai teri yaad ke raston pe chalna kitna bhaari

rakha ho bojh jaise mere sar par kuchh alag sa

agar wa rakkhi jauhar aap ne chashm-e-basirat

dikhai dega har sae mein paikar kuchh alag sa