nazar azabon mein ghir gai hai suKHan sarabon mein aa gaya hai

nazar azāboñ meñ ghir ga.ī hai suḳhan sarāboñ meñ aa gayā hai

sunā hai ab ke bahār-mausam ḳhizāñ kī bātoñ meñ aa gayā hai

ye kyā ġhazab hai ki jis ne ahd-e-bahār chāhā na ishq dekhā

nizām-e-hijr-o-visāl saarā usī ke hāthoñ meñ aa gayā hai

bahār to ik muġhālta hai ḳhizāñ kī rū-posh hairatoñ kā

jo is tilism-e-jahāñ se guzrā vo dāstānoñ meñ aa gayā hai

vo jis ke dāman meñ shā.erī thī bahār-lahje kī luT-luTā kar

ai rabb-e-lafz-o-bayāñ vo shā.er tirī panāhoñ meñ aa gayā hai

bahār kyā ab ḳhizāñ bhī dekhe ġhurūr-e-husn-e-suḳhanvarī meñ

jo āsmānoñ meñ jā basā thā zamīñ ke qadmoñ meñ aa gayā hai

bahār-rut meñ bichhaḌ ke tujh se jo dil pe guzrī vo dil hī jaane

hameñ to itnā patā hai yaaro lahū tak āñkhoñ meñ aa gayā hai

nazar azabon mein ghir gai hai suKHan sarabon mein aa gaya hai

suna hai ab ke bahaar-mausam KHizan ki baaton mein aa gaya hai

ye kya ghazab hai ki jis ne ahd-e-bahaar chaha na ishq dekha

nizam-e-hijr-o-visal sara usi ke hathon mein aa gaya hai

bahaar to ek mughaalta hai KHizan ki ru-posh hairaton ka

jo is tilism-e-jahan se guzra wo dastanon mein aa gaya hai

wo jis ke daman mein shaeri thi bahaar-lahje ki luT-luTa kar

ai rabb-e-lafz-o-bayan wo shaer teri panahon mein aa gaya hai

bahaar kya ab KHizan bhi dekhe ghurur-e-husn-e-suKHanwari mein

jo aasmanon mein ja basa tha zamin ke qadmon mein aa gaya hai

bahaar-rut mein bichhaD ke tujh se jo dil pe guzri wo dil hi jaane

hamein to itna pata hai yaro lahu tak aankhon mein aa gaya hai