nazar ban kar tajalli jalwa-gar hai

nazar ban kar tajallī jalva-gar hai

jahāñ be-sāḳhta sajde meñ sar hai

ye kis se khel ai dil kuchh ḳhabar hai

nazar hai ye hasīnoñ kī nazar hai

vo aate haiñ to aa.eñ un kā ghar hai

zahe-taqdīr kyā achchhī ḳhabar hai

kisī kā har-nafas dil meñ guzar hai

magar āñkhoñ ko kyā is kī ḳhabar hai

zarā bhī sah nahīñ sakte jise tum

vo kaifiyyat hamārī umr bhar hai

phir aage kyā huā saaqī hī jaane

nazar mujh par paḌī itnī ḳhabar hai

qayāmat meñ nishānī zindagī kī

merī tar-dāmanī hai chashm-e-tar hai

vo kyā jaane kisī ke dil kī hālat

jo apne haal hī se be-ḳhabar hai

qadam uThte nahīñ dil baiThtā hai

ḳhudā jaane ye kis kī rahguzar hai

vo gesū khol kar aa.e chaman meñ

sabā laa.ī hai aur uḌtī ḳhabar hai

judā haiñ ai 'zakī' vo jiine vaale

magar jiine kā ilzām apne sar hai

nazar ban kar tajalli jalwa-gar hai

jahan be-saKHta sajde mein sar hai

ye kis se khel ai dil kuchh KHabar hai

nazar hai ye hasinon ki nazar hai

wo aate hain to aaen un ka ghar hai

zahe-taqdir kya achchhi KHabar hai

kisi ka har-nafas dil mein guzar hai

magar aankhon ko kya is ki KHabar hai

zara bhi sah nahin sakte jise tum

wo kaifiyyat hamari umr bhar hai

phir aage kya hua saqi hi jaane

nazar mujh par paDi itni KHabar hai

qayamat mein nishani zindagi ki

meri tar-damani hai chashm-e-tar hai

wo kya jaane kisi ke dil ki haalat

jo apne haal hi se be-KHabar hai

qadam uThte nahin dil baiThta hai

KHuda jaane ye kis ki rahguzar hai

wo gesu khol kar aae chaman mein

saba lai hai aur uDti KHabar hai

juda hain ai 'zaki' wo jine wale

magar jine ka ilzam apne sar hai