nazar-fareb nazara abhi nigah mein hai

nazar-fareb nazāra abhī nigāh meñ hai

ki koī ḳhvāb-numā jism merī raah meñ hai

tamām 'umr kī aahoñ kā hai dhuāñ jis meñ

vo ek ātishīñ lamha dil-e-tabāh meñ hai

vahī hai aaj bhī ehsās be-amāñ huuñ maiñ

mirā vajūd agarche tirī panāh meñ hai

har ek samt se patthar baras rahe haiñ magar

tumhārā dast-e-karam bhī mirī nigāh meñ hai

vahī hai aaj bhī kaifiyyat-e-pashemānī

na jaane kaun sā jazba mire gunāh meñ hai

jalā na de kahīñ duniyā ko ḳhauf hai 'māhir'

vo ek sho'la jo kab se mirī karāh meñ hai

nazar-fareb nazara abhi nigah mein hai

ki koi KHwab-numa jism meri rah mein hai

tamam 'umr ki aahon ka hai dhuan jis mein

wo ek aatishin lamha dil-e-tabah mein hai

wahi hai aaj bhi ehsas be-aman hun main

mera wajud agarche teri panah mein hai

har ek samt se patthar baras rahe hain magar

tumhaara dast-e-karam bhi meri nigah mein hai

wahi hai aaj bhi kaifiyyat-e-pashemani

na jaane kaun sa jazba mere gunah mein hai

jala na de kahin duniya ko KHauf hai 'mahir'

wo ek sho'la jo kab se meri karah mein hai