nazar hum par hamesha jo ba-sad-tashkik rakhte hain

nazar ham par hamesha jo ba-sad-tashkīk rakhte haiñ

diloñ meñ ham unheñ bhī lā.iq-e-taz.hīk rakhte haiñ

buzurgoñ kī tarah hālāt par is daur ke bachche

zabāñ se kuchh nahīñ kahte nazar bārīk rakhte haiñ

unhīñ ke parchamoñ se fat.h ne aThkheliyāñ kī haiñ

jo apnī zindagī ko maut se nazdīk rakhte haiñ

sar-e-majlis qabāle sūrajoñ ke bāñTne vaale

ujālā zehn meñ rakhte haiñ dil tārīk rakhte haiñ

vo āñkheñ hoñ ki dil ho dast-o-pā ho garmī-e-ḳhūñ ho

ham in sab ko samajh kar tere dar kī bhiik rakhte haiñ

sabhī kā pyaar hāsil hai to bas is kā sabab ye hai

ki ham ahbāb meñ apnā ta'alluq Thiik rakhte haiñ

chalo ai 'hosh' ye pūchheñge kūcha-gard qaa.id se

siyāsat mashġhala hai yā koī tahrīk rakhte haiñ

nazar hum par hamesha jo ba-sad-tashkik rakhte hain

dilon mein hum unhen bhi laiq-e-tazhik rakhte hain

buzurgon ki tarah haalat par is daur ke bachche

zaban se kuchh nahin kahte nazar barik rakhte hain

unhin ke parchamon se fath ne aThkheliyan ki hain

jo apni zindagi ko maut se nazdik rakhte hain

sar-e-majlis qabaale surajon ke banTne wale

ujala zehn mein rakhte hain dil tarik rakhte hain

wo aankhen hon ki dil ho dast-o-pa ho garmi-e-KHun ho

hum in sab ko samajh kar tere dar ki bhik rakhte hain

sabhi ka pyar hasil hai to bas is ka sabab ye hai

ki hum ahbab mein apna ta'alluq Thik rakhte hain

chalo ai 'hosh' ye puchhenge kucha-gard qaid se

siyasat mashghala hai ya koi tahrik rakhte hain