nazar hi jabki teri hum pe lutf ki na rahi

nazar hī jabki tirī ham pe lutf kī na rahī

to zindagī kā hai kyā zindagī rahī na rahī

kalī kalī hī rahī aur na phuul phuul rahā

ki ab bahār meñ vo rūh-e-tāzgī na rahī

hamāre ishq ko le kar ulajh gayā nāseh

jab us ke paas koī hujjat-e-qavī na rahī

jabīn-e-shauq hai ādāb-e-ishq se āgāh

isī liye ye dar-e-ġhair par kabhī na rahī

shahīd-e-rasm-e-vafā ko to tum ne dekh liyā

ab aur baat koī bahr-e-āshiqī na rahī

vo rashk-e-sham.a jo mahfil se uTh gayā 'najmī'

phir is ke baad charāġhoñ meñ raushnī na rahī

nazar hi jabki teri hum pe lutf ki na rahi

to zindagi ka hai kya zindagi rahi na rahi

kali kali hi rahi aur na phul phul raha

ki ab bahaar mein wo ruh-e-tazgi na rahi

hamare ishq ko le kar ulajh gaya naseh

jab us ke pas koi hujjat-e-qawi na rahi

jabin-e-shauq hai aadab-e-ishq se aagah

isi liye ye dar-e-ghair par kabhi na rahi

shahid-e-rasm-e-wafa ko to tum ne dekh liya

ab aur baat koi bahr-e-ashiqi na rahi

wo rashk-e-shama jo mahfil se uTh gaya 'najmi'

phir is ke baad charaghon mein raushni na rahi