nazar ek saya-e-abr-e-bala par jam gai hai

nazar ik saya-e-abr-e-balā par jam ga.ī hai

ye kālakh dil se utrī hai ghaTā par jam ga.ī hai

maiñ har but ko harārat kī kashish batlā rahā huuñ

ajab ik barf mere devtā par jam ga.ī hai

zarūr aglī ruteñ ab rāsta bhaTkeñgī is se

ye jo kuchh ret mere naqsh-e-pā par jam ga.ī hai

badan par naqsh rah jaate haiñ aur dil meñ nadāmat

kisī lamhe kī ujlat dast-o-pā par jam ga.ī hai

hamāre sar to āḳhir ḳhaak hī hone the ik din

ye kaisī raushnī teġh-e-jafā par jam ga.ī hai

chhupānā chāhtā thā maiñ use sheroñ meñ apne

ab ek aalam kī aañkh us bevafā par jam ga.ī hai

hamāre paañv meñ chakkar hai vo bhī chāñd kā hai

sitāroñ kī thakan us kī ridā par jam ga.ī hai

nazar ek saya-e-abr-e-bala par jam gai hai

ye kalakh dil se utri hai ghaTa par jam gai hai

main har but ko hararat ki kashish batla raha hun

ajab ek barf mere dewta par jam gai hai

zarur agli ruten ab rasta bhaTkengi is se

ye jo kuchh ret mere naqsh-e-pa par jam gai hai

badan par naqsh rah jate hain aur dil mein nadamat

kisi lamhe ki ujlat dast-o-pa par jam gai hai

hamare sar to aaKHir KHak hi hone the ek din

ye kaisi raushni tegh-e-jafa par jam gai hai

chhupana chahta tha main use sheron mein apne

ab ek aalam ki aankh us bewafa par jam gai hai

hamare panw mein chakkar hai wo bhi chand ka hai

sitaron ki thakan us ki rida par jam gai hai