nazar jhukao aur apni KHata talash karo

nazar jhukāo aur apnī ḳhatā talāsh karo

phir is ke baa'd koī pārsā talāsh karo

badan ke zaḳhm kā ab indimāl mumkin hai

jo zaḳhm-e-rūh ko bhar de davā talāsh karo

talāq dī ga.ī jis ko ye aisī duniyā hai

ye bevafā hai na is meñ vafā talāsh karo

adā-e-shukr hai lāzim ḳhudā mile to sahī

ḳhudā kā vāsta bando ḳhudā talāsh karo

taḌap ho aisī ki haft āsmān khul jaa.eñ

jo sīdhī arsh pe pahuñche du'ā talāsh karo

har ek samt hai chīḳh-o-pukār āh-o-bukā

sukūñ ke saaz meñ lipTī navā talāsh karo

hamāre sar pe musallat haiñ kyoñ bhalā zālim

sab apne aap meñ pahle ḳhatā talāsh karo

nazar jhukao aur apni KHata talash karo

phir is ke ba'd koi parsa talash karo

badan ke zaKHm ka ab indimal mumkin hai

jo zaKHm-e-ruh ko bhar de dawa talash karo

talaq di gai jis ko ye aisi duniya hai

ye bewafa hai na is mein wafa talash karo

ada-e-shukr hai lazim KHuda mile to sahi

KHuda ka wasta bando KHuda talash karo

taDap ho aisi ki haft aasman khul jaen

jo sidhi arsh pe pahunche du'a talash karo

har ek samt hai chiKH-o-pukar aah-o-buka

sukun ke saz mein lipTi nawa talash karo

hamare sar pe musallat hain kyon bhala zalim

sab apne aap mein pahle KHata talash karo