nazar jis waqt bhi un se mili hai

nazar jis vaqt bhī un se milī hai

'ajab mastī kā 'ālam de ga.ī hai

sukūn-e-dil kī ho koī to sūrat

ġham-e-daurāñ vabāl-e-zindagī hai

nigāheñ tishna paimāne haiñ ḳhālī

ye maiḳhāne meñ kaisī bebasī hai

mayassar ho agar bedārī-e-dil

to har zarre meñ shān-e-dilbarī hai

samajhtā jā rahā huuñ ġham kī 'azmat

yahī ab tarjumān-e-zindagī hai

maiñ apnī dhun meñ aage baḌh gayā thā

mujhe manzil ne ḳhud āvāz dī hai

na ghabrā raat kī mahrūmiyoñ se

inhīñ tārīkiyoñ meñ raushnī hai

ise arbāb-e-mai-ḳhāna na bhūleñ

ki 'maikash' mahram-e-bāda-kashī hai

nazar jis waqt bhi un se mili hai

'ajab masti ka 'alam de gai hai

sukun-e-dil ki ho koi to surat

gham-e-dauran wabaal-e-zindagi hai

nigahen tishna paimane hain KHali

ye maiKHane mein kaisi bebasi hai

mayassar ho agar bedari-e-dil

to har zarre mein shan-e-dilbari hai

samajhta ja raha hun gham ki 'azmat

yahi ab tarjuman-e-zindagi hai

main apni dhun mein aage baDh gaya tha

mujhe manzil ne KHud aawaz di hai

na ghabra raat ki mahrumiyon se

inhin tarikiyon mein raushni hai

ise arbab-e-mai-KHana na bhulen

ki 'maikash' mahram-e-baada-kashi hai