nazar jo aate hain auron ko KHasta-haal bahut

nazar jo aate haiñ auroñ ko ḳhasta-hāl bahut

vahī to shahr meñ haiñ sāhab-e-kamāl bahut

vo jin kī fikr-o-nazar ke haiñ dā.ere mahdūd

har ek baat pe karte haiñ vo savāl bahut

ye tīrgī-e-shab-e-vasl mujh se kahtī hai

charāġh-e-hijr ke bujhne kā hai malāl bahut

dar-e-hayāt khulegā kabhī to mere liye

isī umiid pe guzre haiñ māh-o-sāl bahut

mire zavāl meñ pinhāñ uruuj hai terā

tujhe uruuj mubārak mujhe zavāl bahut

baḌe-baḌoñ kī bhī dastār girne vaalī hai

havā-e-shahr-e-havas meñ hai ishti.āl bahut

tamām-shahr se 'naushād' dushmanī hai jise

vo shaḳhs rakhtā hai har-pal mirā ḳhayāl bahut

nazar jo aate hain auron ko KHasta-haal bahut

wahi to shahr mein hain sahab-e-kamal bahut

wo jin ki fikr-o-nazar ke hain daere mahdud

har ek baat pe karte hain wo sawal bahut

ye tirgi-e-shab-e-wasl mujh se kahti hai

charagh-e-hijr ke bujhne ka hai malal bahut

dar-e-hayat khulega kabhi to mere liye

isi umid pe guzre hain mah-o-sal bahut

mere zawal mein pinhan uruj hai tera

tujhe uruj mubarak mujhe zawal bahut

baDe-baDon ki bhi dastar girne wali hai

hawa-e-shahr-e-hawas mein hai ishtial bahut

tamam-shahr se 'naushad' dushmani hai jise

wo shaKHs rakhta hai har-pal mera KHayal bahut