nazar ki ruh ki dil ki saubaten bhi gain

nazar kī ruuh kī dil kī sa.ūbateñ bhī ga.iiñ

gayā shabāb to vo saarī uljhaneñ bhī ga.iiñ

ga.ī javānī to aa.ī shu.ūr kī daulat

qadam qadam pe zamāne se ranjisheñ bhī ga.iiñ

shab-e-visāl kā armāñ na fikr-e-shām-e-alam

vo kārobār-e-junūñ kī navāzisheñ bhī ga.iiñ

safed baal hue tāñk-jhāñk meñ haa.il

kahāñ kā shauq-e-nazāra basārteñ bhī ga.iiñ

junūn-e-ishq bhī ruḳhsat huā shabāb ke saath

vo ratjagoñ kī purānī rivāyateñ bhī ga.iiñ

gunāh hashr meñ Thahrī gunāh kī hasrat

gunāh bhī na kiye aur jannateñ bhī ga.iiñ

ḳhayāl-e-gesū-e-jānāñ safed riish meñ gum

vo chashm-o-lab ke tasavvur kī lazzateñ bhī ga.iiñ

butoñ kī chaah ne kāfir banā diyā thā hameñ

ḳhudā kā shukr hai 'farhat' vo ādateñ bhī ga.iiñ

nazar ki ruh ki dil ki saubaten bhi gain

gaya shabab to wo sari uljhanen bhi gain

gai jawani to aai shuur ki daulat

qadam qadam pe zamane se ranjishen bhi gain

shab-e-visal ka arman na fikr-e-sham-e-alam

wo karobar-e-junun ki nawazishen bhi gain

safed baal hue tank-jhank mein hail

kahan ka shauq-e-nazara basarten bhi gain

junun-e-ishq bhi ruKHsat hua shabab ke sath

wo ratjagon ki purani riwayaten bhi gain

gunah hashr mein Thahri gunah ki hasrat

gunah bhi na kiye aur jannaten bhi gain

KHayal-e-gesu-e-jaanan safed rish mein gum

wo chashm-o-lab ke tasawwur ki lazzaten bhi gain

buton ki chah ne kafir bana diya tha hamein

KHuda ka shukr hai 'farhat' wo aadaten bhi gain