nazar ko phir koi chehra dikhaya ja raha hai

nazar ko phir koī chehra dikhāyā jā rahā hai

ye tum ḳhud ho ki mujh ko āzmāyā jā rahā hai

bahut āsūdgī se roz-o-shab kaTne lage haiñ

mujhe mālūm hai mujh ko gañvāyā jā rahā hai

sar-e-mizhgāñ bagūle aa ke vāpas jā rahe haiñ

ajab tūfān siine se uThāyā jā rahā hai

mirā ġham hai agar kuchh muḳhtalif to is binā par

mire ġham ko hañsī meñ kyuuñ uḌāyā jā rahā hai

badan kis taur shāmil thā mire kār-e-junūñ meñ

mire dhoke meñ us ko kyuuñ miTāyā jā rahā hai

vo dīvār-e-anā jis ne mujhe tanhā kiyā thā

usī dīvār ko mujh meñ girāyā jā rahā hai

mirī ḳhushiyoñ meñ terī is ḳhushī ko kyā kahūñ maiñ

charāġh-e-ārzū tujh ko bujhāyā jā rahā hai

ḳhirad kī sādgī dekho ki zāhir halatoñ se

mirī vahshat kā andāza lagāyā jā rahā hai

abhī ai bād-e-vahshat is taraf kā ruḳh na karnā

yahāñ mujh ko bikharne se bachāyā jā rahā hai

nazar ko phir koi chehra dikhaya ja raha hai

ye tum KHud ho ki mujh ko aazmaya ja raha hai

bahut aasudgi se roz-o-shab kaTne lage hain

mujhe malum hai mujh ko ganwaya ja raha hai

sar-e-mizhgan bagule aa ke wapas ja rahe hain

ajab tufan sine se uThaya ja raha hai

mera gham hai agar kuchh muKHtalif to is bina par

mere gham ko hansi mein kyun uDaya ja raha hai

badan kis taur shamil tha mere kar-e-junun mein

mere dhoke mein us ko kyun miTaya ja raha hai

wo diwar-e-ana jis ne mujhe tanha kiya tha

usi diwar ko mujh mein giraya ja raha hai

meri KHushiyon mein teri is KHushi ko kya kahun main

charagh-e-arzu tujh ko bujhaya ja raha hai

KHirad ki sadgi dekho ki zahir halaton se

meri wahshat ka andaza lagaya ja raha hai

abhi ai baad-e-wahshat is taraf ka ruKH na karna

yahan mujh ko bikharne se bachaya ja raha hai