nazar ko tir kar ke raushni ko dekhne ka

nazar ko tiir kar ke raushnī ko dekhne kā

salīqa hai hameñ bhī zindagī ko dekhne kā

kisī jalte hue lamhe pe apne hoñT rakh do

agar hai shauq jāmid ḳhāmushī ko dekhne kā

samā.at meñ khanaktī raushnī se ho gayā hai

do-bālā lutf miTTī kī namī ko dekhne kā

na jaane lauT kar kab aa.egā mausam ḳhajista

tirī āñkhoñ kī shā.ista hañsī ko dekhne kā

sunā hai shauq thā un ko hunar aatā nahīñ thā

sunahre zehn kī vāraftagī ko dekhne kā

yaqīñ aatā nahīñ lekin milā thā ek mauqa

shagufta shahr kī be-manzarī ko dekhne kā

baḌā armān thā 'sājid' tumheñ kyā Dar ga.e kyā

shab-e-tābāñ havā kī ḳhud-kushī ko dekhne kā

nazar ko tir kar ke raushni ko dekhne ka

saliqa hai hamein bhi zindagi ko dekhne ka

kisi jalte hue lamhe pe apne honT rakh do

agar hai shauq jamid KHamushi ko dekhne ka

samaat mein khanakti raushni se ho gaya hai

do-baala lutf miTTi ki nami ko dekhne ka

na jaane lauT kar kab aaega mausam KHajista

teri aankhon ki shaista hansi ko dekhne ka

suna hai shauq tha un ko hunar aata nahin tha

sunahre zehn ki waraftagi ko dekhne ka

yaqin aata nahin lekin mila tha ek mauqa

shagufta shahr ki be-manzari ko dekhne ka

baDa arman tha 'sajid' tumhein kya Dar gae kya

shab-e-taban hawa ki KHud-kushi ko dekhne ka