nazar mein muddaton ibrat ka manzar baiTh jata hai

nazar meñ muddatoñ ibrat kā manzar baiTh jaatā hai

saf-e-fuqarā meñ jab koī tavangar baiTh jaatā hai

tazād-e-bāhamī ho bhā.iyoñ meñ ik tabāhī hai

hoñ dīvāreñ agar kachchī to phir ghar baiTh jaatā hai

parā.e ho ga.e beTe na pūchheñ lāġharī meñ ab

pareshāñ baap būḌhā sar pakaḌ kar baiTh jaatā hai

zamīr-o-ābrū ḳhuddāriyāñ sab bechī jaatī haiñ

bike zan mard darvāze ke bāhar baiTh jaatā hai

sharākat kī kamā.ī hai to kyoñ laḌ kar gañvāte ho

tarāzū le ke munsif ban ke bandar baiTh jaatā hai

karam hai lok-shāhī kā siyāsat kā karishma hai

karoḌoñ kī kamā.ī karke leader baiTh jaatā hai

thakan ko bhuul kar chalnā hī 'anvar' zindagānī hai

vo manzil pā nahīñ saktā jo thak kar baiTh jaatā hai

nazar mein muddaton ibrat ka manzar baiTh jata hai

saf-e-fuqara mein jab koi tawangar baiTh jata hai

tazad-e-bahami ho bhaiyon mein ek tabahi hai

hon diwaren agar kachchi to phir ghar baiTh jata hai

parae ho gae beTe na puchhen laghari mein ab

pareshan bap buDha sar pakaD kar baiTh jata hai

zamir-o-abru KHuddariyan sab bechi jati hain

bike zan mard darwaze ke bahar baiTh jata hai

sharakat ki kamai hai to kyon laD kar ganwate ho

taraazu le ke munsif ban ke bandar baiTh jata hai

karam hai lok-shahi ka siyasat ka karishma hai

karoDon ki kamai karke leader baiTh jata hai

thakan ko bhul kar chalna hi 'anwar' zindagani hai

wo manzil pa nahin sakta jo thak kar baiTh jata hai