nazar na jaegi ab apni ma-siwa ki taraf

nazar na jā.egī ab apnī mā-sivā kī taraf

ḳharāb ho ke bahut aa.e haiñ ḳhudā kī taraf

zamāne kā hai yahī rang us kī fikr nahīñ

agar zamāna huā tum se be-vafā kī taraf

havā-e-zulf hī laa.ī hai daam meñ apne

qadam ham aap se rakhte nahīñ balā kī taraf

jahāñ se kuuch kī detā hai har-nafas āvāz

kisī ke kaan nahīñ nāla-e-darā kī taraf

tire firāq meñ jab se nahīñ umīd-e-asar

ḳhayāl bhī nahīñ jaanā kabhī duā kī taraf

nazar hai ḳhaas zamāne ke rang par apnī

na ibtidā kī taraf hai na intihā kī taraf

nazar na jaegi ab apni ma-siwa ki taraf

KHarab ho ke bahut aae hain KHuda ki taraf

zamane ka hai yahi rang us ki fikr nahin

agar zamana hua tum se be-wafa ki taraf

hawa-e-zulf hi lai hai dam mein apne

qadam hum aap se rakhte nahin bala ki taraf

jahan se kuch ki deta hai har-nafas aawaz

kisi ke kan nahin nala-e-dara ki taraf

tere firaq mein jab se nahin umid-e-asar

KHayal bhi nahin jaana kabhi dua ki taraf

nazar hai KHas zamane ke rang par apni

na ibtida ki taraf hai na intiha ki taraf